news_header_top_970_100
16+
news_header_bot_970_100

Питрәч мәктәбе татар телендә иң күп китап укучылар бәйгесендә җиңде

Марафонда катнашучылар өч атна дәвамында көн саен татар телендәге әсәрләрне укыды һәм конкурсның исеме хэштегы белән социаль челтәрләрнең берсендә өзекләр урнаштырды.

Питрәч мәктәбе татар телендә иң күп китап укучылар бәйгесендә җиңде
http://pestrecy-rt.ru/

(Казан, 28 февраль, «Татар-информ», «Алга»). Питрәч район үзәгенең икенче мәктәбе татар телендә әсәрләр укучылар арасында үткән унынчы республика «Әдәби марафон»ында җиңүче булды. Бу турыда район басмасы хәбәр итә.

Марафонда катнашучылар өч атна дәвамында көн саен татар телендәге әсәрләрне укыды һәм конкурсның исеме хэштегы белән социаль челтәрләрнең берсендә өзекләр урнаштырды.

«Мин марафонда инде өченче тапкыр катнашам. Быел бик күп шигырьләр һәм хикәяләр укыдым. Кайбер китапларны китапханәдән алдым», — диде 7 «Г» сыйныфы укучысы Даниил Спичков.

Район үзәгенең икенче мәктәбен Татарстан Республикасында иң күп укучы мәктәп буларак кубок белән бүләкләделәр. 7-10 сыйныфларда укучы унсигез балага истәлекле дипломнар, ә укытучылар Елена Галәветдинова, Гөлназ Сафина һәм Лилия Гатиатуллинага исемле кубоклар тапшырылды. Бүләкләү тантанасы Казанда туган тел көнендә узды.

«Төп бүләкне алуыбыз бик куанычлы. Мин укучыларым белән чиксез горурланам», — дип тәэсирләре белән уртаклашты Елена Галәветдинова.

Гадәти булмаган проектны Татнетны үстерү фонды һәм Татар китап нәшрияты оештырды. Проект татарча әдәби әсәрләр, китаплар уку гадәтен формалаштыру максатыннан гамәлгә ашырылган.


autoscroll_news_right_240_400_1
autoscroll_news_right_240_400_2
news_bot_970_100