Татарстанның мәгариф учреждениеләре наркотикларга каршы көрәш өчен бүләкләнде

Бүген Казанда “Наркотиклар таралуга каршы көрәш өлкәсендә ирешелгән нәтиҗәләр өчен” дигән премия лауреатларын бүләкләү тантанасы булды
(Казан, 26 июнь, “Татар-информ”). Бүген Казанның Вахитов районы Балалар иҗаты һәм ялы үзәгендә 2007 ел нәтиҗәләре буенча “Наркотиклар таралуга каршы көрәш өлкәсендә ирешелгән нәтиҗәләр өчен” дигән премия лауреатларын бүләкләү тантанасы булды.
Чарада ТР Министрлар Кабинетының наркотикларга каршы эшне координацияләү буенча баш киңәшче Илһам Яруллин, ТР мәгариф һәм фән министры урынбасары Айрат Зиннуров һәм ТР Мәгариф һәм фән министрлыгы хезмәткәрләре, наркотиклар әйләнешен контрольдә тоту буенча Федераль хезмәтнең ТР Идарәсе оперуполномоченные Вера Герасимова һәм башка рәсми затлар катнашты.
Премия лауреатлары дип Казанның Яңа Савин районы 113нче мәктәбе, ТР Әлки районының Нәби Дәүли исемендәге Базарлы-Матак гимназиясе, Азнакайның 2нче урта гомумбелем бирү мәктәбе, Казанның Мәскәү районы “Ресурс” Психологик-медицина-социаль ярдәм үзәге, Казан педагогика көллияте, Тәтеш педагогика училищесы һәм башка учреждениеләр танылды.