Быелгы җәйдә балалар Кара диңгез буенда ял итә алачак

Ял итү урыннарына балаларны махсус тимер юл составлары һәм чартерлы авиарейслар алып барачак.

(Казан, 25 май, «Татар-информ», Рифат Каюмов). Быелгы җәйдә Татарстанның мәктәп балалары Кара диңгез буенда ял итә алачак. Узган елда чикләүләр сәбәпле балалар республикадан читтәге лагерьларга бара алмады.

Бу турыда Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) Татарстан буенча идарәсе җитәкчесе Марина Патяшина хәбәр итте.

Татарстанның Хөкүмәт йортында узган брифингта республиканың яшьләр эше министры Дамир Фәттахов бу җәйдә 3,2 мең мәктәп баласы Кырым Республикасында һәм Краснодар краенда ял итәчәген әйтте. Яшь татарстанлыларны Краснодар краенда «Зарница», «Янтарь», «Приазовец», «Витязево» лагерьлары, ә Кырымда — Казакевич исемендәге ял йорты көтә.

Ял итү урыннарына балаларны махсус тимер юл составлары һәм чартерлы авиарейслар алып барачак.