Галимҗан Гыйльманов татар теле дәреслегенә бүгенге язучыларның әсәрләрен алуны сорады
Тел, әдәбият һәм сәнгать институты яңа буын татар теле дәреслеген тәкъдим итте.
(Казан, 20 февраль, «Татар-информ», Рузилә Мөхәммәтова). Язучы Галимҗан Гыйльманов татар теле һәм әдәбияты буенча төзелгән дәреслекләргә яңа гасырда иҗат иткән язучыларның әсәрләрен кертергә киңәш итте. Әлеге фикерен ул Тел, әдәбият һәм сәнгать институтының яңа проектларын җәмәгатьчелеккә күрсәтү чарасында җиткерде.
«Галимнәр дәреслекләр язганда бүгенге көн әдәбиятыннан да ешрак файдалансыннар иде. Әдәбиятыбыз киң, бай, ул үсештә», — диде ул.
«Дәреслек татар дөньясын яктырту максаты куйган икән — анда XXI гасыр язучыларына урын булырга тиеш», — диде язучы.
Галимҗан Гыйльманов бу фикерен язучылар исеменнән җиткерүен әйтте.
Г.Ибраһимов исемендәге Тел, әдәбият һәм сәнгать институты директоры Ким Миңнуллин дәреслекнең апробациядә булуын, тәкъдим-киңәшләрнең кабул ителүен әйтте. Ул дәреслекнең камилләштереләчәгенә ышаныч белдерде.