ТР Студентлар лигасының яңа президенты сайлап куелды

Элькин Искәндәров 812 дән 415 тавыш җыеп, алдагы дүрт елга президент дип игълан ителде

(Казан, 19 март, “Татар-информ”, Гөлнар Гарифуллина). Татарстан Республикасы Студентлар лигасының бишенче президенты итеп, Казан илкүләм-тикшеренү технологик университеты студенты Элькин Искәндәров сайланды. Бу минутларда Казанның “УНИКС” мәдәният-спорт комплексында ТР студентлары конференциясендә ике кандидат өчен тавыш бирү төгәлләнде. Искәртеп узабыз, “ТР Студентлар лигасы” оешмасы президенты тәхетенә шулай ук КФУ студенты, “Ел студенты-2013” Гран-при иясе Илдар Хуҗҗәтов та дәгъва кылган иде.
  Элькин Искәндәров 812 дән 415 тавыш җыеп, алдагы дүрт елга президент дип игълан ителде. Илдар Хуҗҗәтов 397 тавыш җыйды. Бу минутларда лиганың вице-президентлар штабына вәкилләр җыю бара.