Роспотребнадзор идарәсендә мәктәпләрдә кемнәрнең битлек кияргә тиешлеген аңлаттылар
Укучылар ата-аналар теләге булган очракта битлек киеп йөри ала.
(Казан, 18 август, «Татар-информ», Эвелина Киселева). Мәктәпләрдә яңа коронавирус инфекциясеннән саклану өчен пешекчеләр һәм техник персонал битлек кияргә тиеш булачак. Бу хакта «Татар-информ» мәгълүмат агентлыгында узган матбугат конференциясендә Роспотребнадзорның ТР буенча идарәсе җитәкчесе урынбасары Любовь Авдонина хәбәр итте.
«Гамәлдәге санитар кагыйдәләр нигезендә техник персонал һәм азык-төлек әзерләүче персонал мәҗбүри битлек киеп йөрергә тиеш. Балаларга битлек кию мәҗбүри түгел. Әгәр ата-аналар үзләре бала битлек кияргә тиеш дип санаса гына — ата-аналар үзләре хәл итә», - диде спикер.
Укытучыларга сыйныфларда саклагыч маскалар кияргә кирәкми, әмма коридорларда һәм сыйныфтан сыйныфка күчкәндә ТР буенча Роспотребнадзор саклану чараларын кулланырга киңәш итә.