КФУның татар журналистикасы бүлегенә Россиянең җиде төбәгеннән гаризалар килгән
Татар журналистикасы бүлегенә килгән гаризалар буенча бер урынга өч кеше дәгъва кыла.
(Казан, 13 июль, «Татар-информ», Гөлүзә Ибраһимова). КФУның Филология һәм мәдәниятара багланышлар институты һәм «Татмедиа» агентлыгы белән берлектә булдырылган журналистларны укыту программасына Россиянең җиде төбәгеннән гаризалар килгән.
«2020 елда „Татмедиа“ агентлыгы белгечләре белән берлектә журналистлар өчен яңа уку планын әзерләдек. Журналистикага бәйле предметларны һәм практика өлешен бүгенге көндә уңышлы һәм нәтиҗәле эшләүче журналистлар алып бара. Гаризаларның күбесе Татарстаннан килде, шулай ук Башкортстаннан — дүрт, Киров өлкәсеннән — ике, Әстерхан, Оренбург, Пермь өлкәсе, Кырым республикасыннан берәр гариза бар», — дип сөйләде институт директоры Рәдиф Җамалетдинов.
Директор сүзләренчә, бер урынга өч кеше туры килә.
Укыту программасына килгәндә, студентлар атнаның биш көнен институтта укый, ә бер көнгә «Татмедиа» агентлыгына практикага килә. «Практикалар беренче курстан ук башлана. Студентлар үзләре теләгән редакциягә практикага бара», — ди ул.
Укыту программасына документларны 25 июльгә кадәр кабул итәләр. 26 июль көнне татар теле буенча имтихан булачак.