Мәктәпләрдә йомгаклау иншалары темаларын игълан итү тәртибен үзгәртергә телиләр

Бу интернеттан күчерелгән эшләр санын киметү өчен эшләнә, диде Россиянең мәгариф министры.

(Казан, 5 ноябрь, “Татар-информ”). Россия Мәгариф министрлыгы 11 сыйныф укучылары өчен йомгаклау иншалары темасын игълан итү тәртибен үзгәртергә тели. Бу хакта ведомство башлыгы Ольга Васильева әйтте, дип яза РИА Новости.

"Темаларны игълан итү тәртибен үзгәртү интернеттан күчерелгән эшләр санын киметү өчен эшләнә", - диде Васильева.

“Рособрнадзор белән берлектә якын арада йомгаклау иншалары темаларын игълан итү тәртибен үзгәртербез дип уйлыйм. Чөнки без традицион рәвештә блокларны игълан итәбез, алар бишәү. Бу иншаларны халык интернеттан гадел юл белән ала һәм шулай ук безгә тапшыра”, - диде министр Бөтенроссия рус теле һәм әдәбияты укытучылары съездында.

Васильева әйтүенчә, хәтта интернеттан алынган иншаларда да мәктәп укучылары орфографик һәм синтаксик хаталар калдыра.