Биектау районында 635 укытучы 5500 укучы белән онлайн-дәресләр алып бара

Биектау районы башлыгы видеодәрестә булды.

 (Казан, 4 май, «Татар-информ»). Биектау муниципаль районында 635 укытучы 5437 укучы белән онлайн-дәресләр алып бара. Һәр дәрес 30 минут бара. Дәресләрнең ничек узуы белән район башлыгы Рөстәм Кәлимуллин да танышты. Бу турыда «Высокогорские вести» газетасы хәбәр итә.

Район башлыгы Бөреле урта мәктәбенең 11 сыйныф укучылары өчен рус әдәбияты буенча видеодәрестә булды. Ул дистанцион уку сыйфатын тикшерде, сыйныф җитәкчесе һәм укучылар белән аралашты. Өлкән сыйныф укучылары мәктәпне сагынуын һәм мондый форматта уку җиңел түгел, әмма барлык авырлыкларны да уңышлы үтәүләрен таныды.

Яңа форматтагы дәресләр махсус онлайн-платформаларда уза. Укытучы әйтүенчә, дистанцион белем бирү бөтен мәгариф системасы өчен бөтенләй яңа тәҗрибә булган.