Россия Фәннәр академиясе реформасы – ул галимнәргә карата ниндидер шикле эш – ТР Фәннәр академиясе

  (Казан, 1 июль, «Татар-информ», Рүфинә Мөбәракшина). “Россия Фәннәр академиясе реформасы – ул галимнәргә карата ниндидер кыңгыр эш”, – дип билгеләп үтте ТР Фәннәр академиясе президиумы киңәшчесе Әхәт Ильясов “Татар-информ” МА хәбәрчесенә биргән әңгәмәсендә.
Аның сүзләренә караганда, фәнни җәмәгатьчелек бу вәзгыять уңаеннан борчыла. “Монда тирәнтен фикер алышу зарур. Карарны Хөкүмәт түгел, ә фәнни бергәлек тарафыннан кабул ителергә тиеш”, - дип ассызыклады ул.
“Нәрсәдер тәкъдим иткәнче барысын да җентекләп эшләргә һәм беренче чиратта аңлау зарур. Ливанов җитәкчелегендәге РФ Мәгариф министрлыгы безгә көчләп тага торган нәрсә – аңлаешсыз”, диде - ТР Фәннәр академиясе президиумы киңәшчесе. “Әгәр закон проекты кабул ителсә, академия институтларсыз калачак”, - дип шәрехләде галим.
Искәртеп узабыз, Россия Фәннәр академиясенең Казан фәнни үзәге ашыгыч рәвештә уздырылган җыелыштан соң Россия Президенты Владимир Путинга Россия Фәннәр академиясе реформасы уңаеннан хат юллады.