Сарман районында десантчыларга һәйкәл ачылган
Һәйкәлгә чәчәкләр салынды, һәлак булганнар истәлегенә бер минутлык тынлык игълан ителде.
(Сарман, 3 август, "Татар-информ", "Сарман", Зөлфия Шәрипова). Кичә Һава десанты гаскәрләре көне уңаеннан Сарман район үзәгендә десантчыларга һәйкәл ачу тантанасы үткәрелде. Бу турыда район басмасы хәбәр итә.
Анда мәртәбәле кунаклар Идел буе федераль округы буенча дәүләт авиация һәм транспорт иминлеген тәэмин итү күзәтчелеге идарәсенең начальник урынбасары – Дәүләт авиация күзәтчелегенең татар территориаль бүлеге начальнигы Альберт Сафин, Татарстан Республикасы ДОСААФ төбәк иҗтимагый дәүләт берләшмәсе идарәсе рәисе Дамир Диниуллов катнашты.
Тантанада катнашучыларны район башлыгы Фәрит Хөснуллин һәм мәртәбәле кунаклар сәламләделәр. Десантчыларга багышланган җырлар яңгырады, илебез азатлыгы өчен башларын салганнар истәлегенә куелган һәйкәлгә чәчәкләр салынды, һәлак булганнар истәлегенә бер минутлык тынлык игълан ителде.
Ә стеланы ачу хокукы Фәрит Хөснуллинга һәм тантанада катнашучы мәртәбәле кунакларга бирелде.