Сарман районы хәрбие махсус операциядә медальләр белән бүләкләнгән
Рамил Шәйдуллин Татарстанның Сарман районы Җәлил бистәсендә туып-үскән. Бүген ир-ат Туган ил сагында һәм алгы сызыкта зур уңышларга ирешкән. Ялда булганда, хәрби үз юлы һәм махсус операция зонасындагы вазгыять турында сөйләде.
Рамил 2нче урта мәктәптә 9нчы сыйныфны тәмамлагач аграр көллияткә укырга керә. «Безнең сыйныф җитәкчесе Рәйхан Зиннур кызы иде. Ул барыбызга да бертигез карады, безне дус коллективка туплады. Мин аңа бүген дә рәхмәтле. Шулай ук минем көллияттәге остазым Виталий Болтоносовка да рәхмәт», – ди хәрби хезмәткәр.
2003 елда аны армиягә алалар, анда ул Пермь краенда махсус билгеләнештәге гаскәрләрдә хезмәт итә. Солдат мәктәбе аны чыныктыра һәм җаваплы булырга өйрәтә. Соңрак ул Әлмәттә политехника көллиятен тәмамлый, аннары Җәлил технологик транспорт идарәсендә эшли башлый.
«Җитәкчебез Рәис Кәлимуллин ярдәмендә зур тәҗрибә тупладым. Ул безнең өчен чын терәк булды, һәрвакыт ярдәм итәргә әзер иде. Аның киңәшләре безгә тормышта бик кирәк булды», - дип искә ала Шәйдуллин.
Үзен Татарстаннан читтә сынап караганнан соң, Рамил 2022 елда кире кайта һәм контракт төзеп махсус хәрби операция зонасына китә.
Хәзер Рамил туган якларына отпускка кайткан, әмма ярасы аны госпитальгә алып килгән. Хәер, инде бишенче очрак булуга, тәнендә калган җәрәхәтләр һәм кыйпылчыклар булуга карамастан, ул нык рухлы булып кала.
«Мине җиңел генә сындырып булмый. Тәбәнәк буйлы булсам да, көчем җитәрлек. Аллаһ безне ташламас. Без булмасак, илне кем саклаячак? Без Ватан алдындагы бурычыбызны үтибез», - ди старшина.
Батырлыгы һәм антына тугрылыгы өчен Рамил Шәйдуллин Жуков медале, өч дәрәҗә «Батырлык өчен» медале һәм Батырлык ордены белән бүләкләнгән.
Дуслары аны Петюня дип йөри. Ул җитезлеге һәм тапкырлыгы белән бер танылган фильмның героен хәтерләтә.
Элегрәк Татарстан Рәисе Рөстәм Миңнеханов Мәскәү Кремлендә Россия Президенты Владимир Путин белән очрашуда республикадан махсус хәрби операциягә, мобилизацияләнүчеләр һәм контрактникларны да кертеп, 38 169 кеше китүе турында сөйләгән иде. «Бездә 15 Россия Герое бар, шуларның җидесе бу исемгә үлгәннән соң лаек булды. Республикадан 1829 хәрби хезмәткәр Батырлык ордены белән бүләкләнде», – диде ул.
Материал Альбина Сабирова ярдәмендә әзерләнде.