news_header_top_970_100
16+
news_header_bot_970_100

Шәриф Камал премиясе иясе: Хикәямне китап итеп туплап, Америкага туганнарга җибәрдек

Шәриф Камал премиясе иясе: Хикәямне китап итеп туплап, Америкага туганнарга җибәрдек
Фото: Зөһрә Ильясова

Татарстан Республикасы Милли музее филиалы – Татар китабы йортында Шәриф Камал исемендәге бишенче әдәби премия ияләрен бүләкләү тантанасы булды. Әлеге премиянең җиңүчесе Эльвина Мөхәммәдиева хикәяләрен Америкада яшәүче туганнарына җибәрүен әйтте.

«Шәриф Камал конкурсында проза буенча беренче тапкыр катнашуым. Бала тапкач, аның турында хикәяләр язу теләге туды. Шулай итеп, «Раян белән Шаян» дигән хикәяләр циклын иҗат иттем. Анда улым һәм күрше песие турында берничә хикәя тупланган. Без аны Шаян дип йөртәбез. Үзем, гаиләм өчен дип кенә язган идем, Америкада яшәүче туганнарга китап итеп ясап җибәрдек, чөнки анда татар китаплары юк», - диде ул «Татар-информ» хәбәрчесенә.

Эльвина Мөхәммәдиева күбесенчә шигырьләр язуын әйтте. «Хикәяләремне юри генә шушы конкурска җибәреп карадым, берничә атнадан нәтиҗәләре билгеле булды һәм миңа шалтыраттылар. Бик шатландым. Баштан ышанмадым, чөнки мин проза язган кеше түгел, шигырьләр иҗат итәм. Аеруча балалар өчен язу беренче тәҗрибәм булды. Шул шатлыктан заказга балалар өчен исемле китаплар ясый башладым», - диде яшь иҗатчы.

  • Шәриф Камал исемендәге әдәби премия 2020 елда Татарстан Мәдәният министрлыгы тарафыннан гамәлгә куелды. Премиягә дәгъва итүчеләр арасындагы бәйгене оештыручылар: Татарстан Милли музее һәм аның филиалы – Шәриф Камал мемориаль фатиры белән Татар әдәбияты тарихы музее (Татар китабы йорты).

  • Бүгенге көндә әлеге бүләк - 14 яшьтән алып 35 яшькә кадәрге татар телендә хикәя яки повесть язучы, әсәрне татарчадан чит телләргә тәрҗемә итүче яшь язучылар һәм тәрҗемәчеләр өчен бердәнбер премия. Быел ул республиканың Милли музееның 130 еллыгына, Шәриф Камалның музей-фатирының 75 еллыгына һәм Шәриф Камалның «Акчарлаклар» повестенә 110 ел тулуга багышлана.

autoscroll_news_right_240_400_1
autoscroll_news_right_240_400_2
news_bot_970_100