Санкт-Петербургта «Татар кызы 2026» сайланды
Узган шимбәдә Санкт-Петербургта «Татар кызы Санкт-Петербург 2026» конкурсы узды. Чара күпсанлы тамашачыларны бергә җыйды һәм иҗат атмосферасында узды, дип хәбәр итә Бөтендөнья татар конгрессы матбугат хезмәте.
Конкурста катнашучы кызлар үзләренең талантларын, матурлыкларын һәм осталыкларын күрсәтте. Барлык финалистлар да зур энтузиазм белән әзерләнгәннәр. Һәр чыгыш уникаль һәм истә калырлык булды. Бу чын бәйрәм атмосферасы тудырырга мөмкинлек бирде.
«Татар кызы Санкт-Петербург 2026» финалы алып баручылар Диләрә Юсупова һәм Әмир Ибраһимовның җитәкчелеге астында үтте. Алар кичәне тагын да күңеллерәк һәм истә калырлык иттеләр. Шулай ук финал концертында талантлы башкаручылар Линара Николашкина һәм Гөлназ Железнова чыгыш ясады. Махсус кунак — Казаннан килгән композитор, музыкант, яшь шагыйрь, Tubatay.beats һәм Yummy music төркемнәре катнашучысы Ильяс Фәрхуллин бәйрәмгә аерым бер атмосфера өстәде.
Конкурста Бакирова Нурия һәм Солтанова Алина җиңүче дип танылды. Нурия «Татар Кызы Санкт-Петербург 2026» исемен яулады, ә Алина «Татар Кызы Ленинград өлкәсе 2026» титулына лаек булды. Алар икесе дә «Татар кызы – 2026» финалында катнашачак.
Конкурс талант күрсәтү мәйданчыгы гына булып калмыйча, аралашу, тәҗрибә уртаклашу һәм мәдәни алмашу мөмкинлеге дә бирде. Мондый чаралар татар мәдәниятен һәм гореф-гадәтләрен ныгытуга ярдәм итә.
Оештыручылар җирле Татар милли-мәдәни мохтарияте рәисе Рәисә Яркаевага, аның урынбасары Ирек Мөхәммәтхановка, «Питер буйлары» рәисе Юлия Хучевага, фотограф Лилия Ибрагимовага рәхмәт белдерәләр. Чараны әзерләүгә һәм үткәрүгә зур өлеш керткән «Татар кызы 2025» конкурсы җиңүчесе Шәйдуллина Ралинага аерым рәхмәт сүзләре юллана. Аның энергиясе һәм идеяләре күпләрне илһамландырды, ди оештыручылар.