Санкт - Петербургта мәгърифәтче Мөхлисә Бубига багышланган иҗат кичәсе узачак
Иҗат кичәсендә Мөхлисә Бубиның оныгының кызы Камилә Гильметдинова да катнашачак.
(Казан, 12 декабрь, «Татар-информ»). 14 декабрь көнне милли әдәбият китапханәсендә «Татар кунакханәсе» мәдәни-агарту проекты кысаларында «Татар халкының легендар вәкиле, мәгърифәтче хатын-кыз Мөхлисә Буби» дип исемләнгән иҗат кичәсе узачак. Бу хакта Татарстан Республикасының Санкт-Петербург шәһәрендәге һәм Ленинград өлкәсендәге даими вәкиллеге матбугат хезмәте хәбәр итә.
Әлеге чара Татарстан Республикасының Санкт-Петербург шәһәрендәге һәм Ленинград өлкәсендәге Даими вәкиллеге ярдәмендә «Ак калфак-Нева» татар хатын-кызларының Санкт-Петербург иҗтимагый оешмасы инициативасы белән үткәрелә.
Иҗат кичәсендә Мөхлисә Бубиның оныгының кызы Камилә Гильметдинова да катнашачак.
Мөхлисә Буби (1869-1937) - ислам дөньясында беренче һәм татар тарихындагы бердәнбер хатын-кыз-казый (шәригать судьясы). Аның эшчәнлегенең төп идеясе - хатын-кызларны агарту, аларның хокукларын яклау һәм, димәк, заманча җәмгыятьне камилләштерү юлы белән юнәлтү.