Санкт-Петербургта Лев Гумилевны искә алдылар
1 октябрьдә, Лев Гумилевның туган көнендә, Александр-Невский Лаврасының Никольск зиратында аның каберенә чәчәкләр салдылар.
Әлеге чарада Лев Гумилев исемендәге Төньяк-көнбатыш фәнни үзәге җитәкчесе Шамил Әхмәтшин, Санкт-Петербургта Татарстан Республикасының Даими вәкиле урынбасары вазифаларын башкаручы Дамир Сабиров, татар иҗтимагый оешмалары җитәкчеләре, Лев Гумилевның укучылары, Санкт-Петербург халкы һәм кунаклары катнашты.
Санкт-Петербургта һәм Татарстан Республикасында тарихчыны хөрмәт итәләр һәм хәтерлиләр. 2008 елда Татарстан Хөкүмәте инициативасы белән Александр-Невский лаврасының Никольск зиратында күренекле галим, Санкт-Петербург университеты профессоры Лев Николаевич Гумилев һәм аның хатыны Наталья Викторовна Гумилева кабер ташы реставрацияләнде. 2015 елда галимнең туган көнендә Санкт-Петербург дәүләт университетының көнчыгыш факультеты ишегалдында Л. Н.Гумилевка бюст ачылды. Һәйкәл Татарстан Республикасыннан төньяк башкалага бүләк итеп тапшырылды.
Чара Татарстан Республикасының Санкт-Петербург шәһәрендәге һәм Ленинград өлкәсендәге Даими вәкиллеге тарафыннан оештырылды.