Санкт-Петербургта Җәлил укулары булды
Санкт-Петербургның Татар мәдәни үзәгендә татар шагыйре, Советлар Союзы Герое Муса Җәлилгә багышланган иҗат кичәсе узды. Ул «Җәлил укулары» VI Халыкара әдәби конкурсы һәм «Татар кунак йорты» мәдәни-агарту проекты кысаларында оештырылды. Аны Татарстанның Санкт-Петербург шәһәрендәге һәм Ленинград өлкәсендәге Даими вәкиллеге үткәрде. Бу хакта Даими вәкиллек матбугат хезмәте хәбәр итә.
Быел конкурс көндезге һәм дистанцион форматларда үткәрелде һәм укучыларның чыгышларының бер өлеше Казан шәһәренә конкурсның киләсе этабына җибәрелде.
Укуларга теләге булган һәркем чакырылган иде, ата-аналар белән мәктәпкәчә яшьтә катнашучылар, шулай ук өлкәннәр һәм Санкт-Петербург мәктәпләрендә укучылар, «Образ» сәнгатьле уку студиясенә йөрүчеләр, Каюм Насыйри үзәгендә татар теле курсларын тыңлаучылар күп иде. Җәлил укулары татар шигъриятен яратучыларны кабат берләштерде, диелә хәбәрдә.
Яшь укучылар һәм «Җәлил укуларында» даими катнашучылар шигырьләрне татар һәм рус телләрендә укыды. Бигрәк тә яшь укучылар барысын да, тыңлаучыларны да, кунакларны да шатландырды, ә иң мөһиме, бу әһәмиятле чарада һәр кешенең кәефе күтәренке иде, ди оештыручылар.
Кунакларга яшь катнашучылар башкаруында җыр-бию чыгышлары тәкъдим ителде. Чара азагында конкурста катнашучыларга Татарстанның Санкт-Петербург шәһәрендәге һәм Ленинград өлкәсендәге Даими вәкиленең Рәхмәт хатлары тапшырылды.