Самара өлкәсендә «Родничок» лагеренда тәрбияләнүчеләр татар мәдәнияте белән танышты
Самара өлкәсе Шонтала тимер юл станциясенең 1 номерлы урта гомуми белем бирү мәктәбенең «Родничок» лагеренда тәрбияләнүче балалар Самара өлкәсенең Шонталы районында урнашкан Денискино авылы музеенда булды. Бу хакта «Самара татарлары» сайтында хәбәр итәләр.
Балалар Денискино авылы музее һәм китапханәсе буйлап мавыктыргыч экскурсия барышында төбәкнең бай тарихы һәм мәдәнияте белән танышты. Аннан соң кызлар һәм малайлар кош теле әзерләү буенча мастер-класста катнашты. Әлеге традицион татар ризыгы десерт кына түгел, ә кунакчыллык һәм халык традицияләре символы да, диелә хәбәрдә.
Фото: © «Самара татарлары» сайты
Мастер-класстан соң «Родничок» лагерендә тәрбияләнүчеләр музей хезмәткәрләренә җылы кабул итүләре һәм татар мәдәнияте белән танышулары өчен рәхмәт белдергән. Алар янәдән тарих һәм традицияләр дөньясына чуму һәм башка милли ризыклар әзерләргә өйрәнер өчен кабат килергә вәгъдә иткән.
Бу көн балаларның хәтерендә шатлык һәм яңа белемнәргә бай матур вакыйга булып истә калачак.