news_header_top_970_100
news_header_bot_970_100

Салым түләмәгән юридик затлардан пени икеләтә алыначак

2016 ел өчен милек салымы 1 декабрьгә кадәр түләнеп бетәргә тиеш.

(Казан, 28 ноябрь, «Татар-информ», Гүзәл Насыйбуллина). Быелдан юридик затлар өчен салым түләмәү шактый чыгымлыга әйләнде, дип хәбәр итте Россия салым федераль хезмәтенең Татарстан буенча идарә җитәкчесе урынбасары Андрей Никиташин “Татар-информ” мәгълүмат агентлыгында уздырылган матбугат конференциясендә. 2017 елдан салым түләүләрен башкармаган предприятие, эшмәкәрләр өчен пени күләме икеләтә арттырылган.

“Россия җинаять кодексы нигезендә, салым җыюдан качып йөрү һәм салым алынырга тиешле акчаларны һәм милекне яшергән өчен җинаять җаваплылыгы да яный. 2017 елның августыннан иминият кертемнәрен түләүдән качкан өчен дә җинаять җаваплылыгы каралган”, - дип кисәтте Андрей Никиташин.

Аның сүзләренчә, быел шушы маддәләр нигезендә Россия Тикшерү комитетының Татарстан буенча  идарәсе тарафыннан җинаять эше кузгатуга 923 млн сумлык 47 материал юнәлтелгән. Тикшерү һәм суд чаралары барышында бюджетка 110 млн сум бурыч кайтарылган.

Искәртеп узабыз, 2016 ел өчен милек салымын түләү 1 декабрьгә кадәр башкарылырга тиеш. Пенилар бурычның 31 нче көненнән алына башлый.

news_right_column_1_240_400
news_right_column_2_240_400
news_bot_970_100