Шаляпин фестивалендә «Сөембикә» операсы да күрсәтеләчәк
Ф.И.Шаляпин исемендәге XLIII Халыкара опера фестивалендә Резеда Әхиярованың «Сөембикә» операсы да күрсәтеләчәк.
«Фестиваль 2025 елның 31 гыйнварыннан 2 мартка кадәр үткәреләчәк. Фестиваль программасы Ж.Бизеның «Кармен» операсының премьерасы белән ачыла», – дип хәбәр итә Муса Җәлил исемендәге Татар дәүләт опера һәм балет театрының матбугат үзәге.
Театр «Сөембикә» операсын 8 февральдә күрсәтәчәк.
Афишада традиция буенча классик репертуарга караган әсәрләрдән Дж.Пуччининың «Тоска» һәм «Мадам Баттерфляй» (19 һәм 21 февраль), Дж.Вердиның «Трубадур» (27 февраль), П.Чайковскийның «Пиковая дама» (16 февраль) бар. 13 февральдә - Ф.И.Шаляпинның туган көнендә театр сәхнәсендә М.Мусоргскийның «Борис Годунов» музыкаль драмасы тәкъдим ителә.
Фестиваль программасы 1 һәм 2 март көннәрендә гала-концерт белән төгәлләнә.
- «Сөембикә» операсының премьерасы 2018 елның 26, 27 сентябрь көннәрендә үтте. Либретто авторы – Татарстанның халык шагыйре Ренат Харис.