Салкыннарга ияләнә тору өчен Казанга иртәрәк кайттык – Хавьер Грасия
"Рубин" футбол командасының баш тренеры Хавьер Грасия Россия кубогы ярышларының финалына кадәр барып җитәргә хыяллана.
(Казан, 27 февраль, «Татар-информ», Фәрит Салихов). "Рубин" футбол клубы бүген матбугат конференциясе уздырды. Команданың баш тренеры Хавьер Грасия кышкы тәнәфестә уздырган җыеннарга нәтиҗә ясады һәм сезонның икенче өлешенә әзерлек турында сөйләде.
"Җыеннарның ничек узуы һәм сезонның икенче өлешенә әзерлек белән мин бик канәгать. Иптәшләрчә очрашулар аша билгеле бер күләмдә күнегүләр уздыруны максат итеп куйган идек һәм шуңа ирештек тә. Контроль уеннар бик күп булды. Аларда команда үзен яхшы күрсәтте, барлык футболчылар да тиешле дәрәҗәдә уйнады. Без яхшы форма тупладык", – диде Хавьер Грасия.
Дөрес, команданы имгәнүләр дә читләп үтмәгән. Баш тренер соңгы уенда кайбер футболчыларның сафтан чыгуын әйтеп узды.
"Соңгы матчта Рубен Рочина имгәнде. Күпме вакыт уйный алмаячагын әле әйтеп булмый. Аннан тыш Максим Лестьенн һәм Алекс Сонг та имгәнде. Шул ук вакытта кышкы тәнәфестә командада үзгәрешләр дә булды – кайбер уенчылар командадан китте. Хәзер безнең төп максат – калган уенчылар белән югары нәтиҗәләргә ирешү. Сезонның калган өлешендә 16 матч уздырырга хыялланабыз – аның 13е Россия чемпионатында булса, калган өчесе Россия кубогы матчлары", – ди баш тренер команданың Россия кубогында финалга кадәр узарга нияте барлыгын күрсәтеп.