Салават Юзеевның татарметражкасын Санкт-Петербургта күрсәтәчәкләр
Салават Юзеевның “Киллер” кыскаметражлы фильмы Санкт-Петербургта уздырыла торган Халыкара кыскаметражлы кино һәм анимация фестиваленә алынган.
(Казан, 6 февраль, «Татар-информ», Рузилә Мөхәммәтова). Салават Юзеевның “Киллер” кыскаметражлы фильмы Санкт-Петербургта уздырыла торган Халыкара кыскаметражлы кино һәм анимация фестиваленә алынган. Бу хакта фильмның продюсеры Марина Галицкая хәбәр итә.
Искәртеп үтәбез, фестиваль әле яңа – ул 2017 елдан башлап кына уздырыла. Фестиваль ел дәвамында бара. Бөтен дөнья буйлап сайлап алынган фильмнар Санкт-Петербургның төрле кинозалларында күрсәтелә. Фестивальнең темасы алдан игълан ителә. Хәзерге вакытта Интернетка һәм хатын-кызларга багышланган фильмнар кабул ителә. Аларның озынлыгы 15 минуттан артмаска тиеш.
“Киллер”да сюжет гашыйк пар тирәсендә бөтерелә. Егет – киллер. Кыз сөйгәненә гадәти булмаган үтенеч белән мөрәҗәгать итә, әмма егеткә аны үтәү җиңел булып чыкмый. Рольләрдә – Минвәли Габдуллин белән Ләйсән Дусаева, шулай ук Айгөл Миңнуллина, Артур Шәйдуллин, Алинә Ризванова.
Сценарий авторы - Ркаил Зәйдулла. “Киллер” - “Татарометражкалар: мәхәббәт һәм үлем турында мәзәк хәлләр” дигән гомуми исем астындагы кыска метражлы фильмнарның берсе.