Салават Фәтхетдинов үзенең Шамил Закиров исемендәге премиясен Рәсимә Сафиуллинага тапшырды
Камал театры сәхнәсендә "Тантана" театр премиясе лауреатлары игълан ителде.
(Казан, 28 февраль, «Татар-информ», Рузилә Мөхәммәтова). “Тантана” театр премиясе кысаларында төп номинацияләрдән тыш Татарстан Мәдәният министрлыгының, Татарстан Президенты каршындагы мәдәниятне үстерү фондының, Казан шәһәре мэриясенең, “Сәхнә” журналының махсус призлары да тапшырылды.
Мәдәният министрлыгы Әтнә татар дәүләт театры артисты Зөһрә Мөхәммәтшинаны, Минзәлә татар дәүләт драма театры артисты Динара Акматованы махсус приз белән билгеләп үтте. Әлеге яшь артистлар театр белгече, “Тантана” театр преимиясе комиссиясе әгъзасы Нияз Игъламов әйткәнчә, “Җиңүгә бик якын торган” номинантлар. Татарстан Президенты каршындагы мәдәниятне үстерү фондының башкарма директоры Нурия Хашимова фонд премиясен Бөгелмә рус дәүләт театры Руслан Фәйзрахмановка; “Сәхнә” журналы премиясен аның баш мөхәррире Зиннур Хөснияр К.Тинчурин исемендәге татар дәүләт драма һәм комедия театры режиссеры Резеда Гариповага тапшырды.
“Тантана” театр премиясе кысаларында тапшырыла торган тагын бер махсус приз бар. Аны Салават Фәтхетдинов гамәлгә куйган һәм ул Г.Камал театрының легендар директоры Шамил Закиров исемен йөртә. Әлеге премияне Салават Г.Камал театры хезмәткәрләренә тапшыра. Быел бу премия бишенче тапкыр бирелде. Салават Фәтхетдинов әлеге премияне театрга килгән һәркемне елмаеп каршы алучы билетерша Рәсимә Сафиуллинага тапшырды.
