Җәмгыять 21 февраль 2025 08:21

Шәйхразыев Урал федераль округының татар иҗтимагый оешмалары җитәкчеләре белән очрашты

Скопировать ссылку

Тубылда Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев Урал федераль округының татар иҗтимагый оешмалары җитәкчеләре һәм активы белән очрашты. Очрашу Тубыл драма театрында узды, дип хәбәр итә Бөтендөнья татар конгрессы матбугат хезмәте.

Чарада Курган, Чиләбе, Төмән һәм Свердловск өлкәләре, Ханты-Манси автономияле округы, Ямал-Ненец автономияле округы, Татарстан Республикасы, шулай ук Омск өлкәсе вәкилләре катнашты.

Утырыш Коръән укудан һәм сәламләү сүзләреннән башланды. Дога уку өчен сүзне Төмән өлкәсе мөселманнарының Төбәк Диния нәзарәте үзәкләштерелгән дини оешмасы рәисе Ибраһим хәзрәт Суховка бирделәр.

Васил Шәйхразыев үз чыгышында чарада катнашучыларны Татарстан Хөкүмәте, Бөтендөнья татар конгрессы исеменнән сәламләде һәм федераль округларда ел саен үткәрелә торган очрашулар турында сөйләде. Утырышта шулай ук Бөтендөнья татар конгрессының 2024 елдагы эш нәтиҗәләре турындагы видеоролик тәкъдим ителде. Видеопрезентация татар җәмгыятенең казанышларын, шулай ук узган ел гамәлгә ашырылган проектларны һәм инициативаларны күрсәтте.

Әлеге чарада татар иҗтимагый оешмалары җитәкчеләре чыгыш ясады. Аларның һәркайсы ирешелгән уңышлар турында үз фикерләрен әйтте, алдагы елга төп бурычларны һәм эш юнәлешләрен билгеләде.

Шулай итеп, Тубылда очрашу агымдагы мәсьәләләр буенча фикер алышу өчен мәйданчык кына түгел, ә Урал федераль округы татар иҗтимагый оешмалары арасында элемтәләрне ныгыту өчен дә мөмкинлек булды. Катнашучылар уртак тырышлыклар киләчәктә уңай үзгәрешләргә һәм яңа казанышларга китерәчәгенә ышаныч белдерделәр.

Сәхифәләр

Шәйхразыев Урал федераль округының татар иҗтимагый оешмалары җитәкчеләре белән очрашты