Шәймиев СССРның ЮНЕСКОга керү юбилеена багышланган Халыкара конференциядә катнашты
28 мартта «ТИСБИ» институтында «Тотрыклы үсеш мәнфәгатьләрендә белем бирү мохитеннән мәгариф экосистемасына күчү» халыкара фәнни-гамәли конференциясе ачылды. Ул СССРның (Россия) ЮНЕСКОга керүенең 70 еллыгына багышланган.
Татарстан Рәисе матбугат хезмәте хәбәр иткәнчә, бу конференциянең пленар утырышында ТР Дәүләт Киңәшчесе, ЮНЕСКОның Игелекле ихтыяр илчесе Минтимер Шәймиев, Россиянең ЮНЕСКО эшләре буенча комиссиясенең җаваплы секретаре Татьяна Довгаленко, РФ Дәүләт Думасы депутатлары Татьяна Ларионова һәм Олег Смолин, Татарстан Дәүләт Советының Мәгариф, мәдәният, фән һәм милли мәсьәләләр комитеты рәисе Айрат Зарипов һәм башкалар катнашты.
Довгаленко билгеләп үткәнчә, Россиянең ЮНЕСКО эшләре буенча комиссиясендә Татарстан белән хезмәттәшлекне югары бәялиләр. Аның сүзләренә караганда, республика ЮНЕСКО проектларында иң актив катнашучыларның берсе. Ул шулай ук Минтимер Шәймиевка, ТР Рәисе Рөстәм Миңнехановка һәм хәзерге администрация командасына аларның ЮНЕСКО проектларына игътибары өчен рәхмәт белдерде.
«21 апрельдә СССРның Бөекбританиядәге илчесе Яков Малик ЮНЕСКО Уставына имза куйганнан бирле, нәкъ 70 ел була, һәм без Берләшкән милләтләр оешмасының Мәдәният, фән һәм мәгариф мәсьәләләре буенча махсус оешмасына кушылдык. Бүген дөньяда конфликтлар һәм чакырулар күп. Сәяси тотрыксызлык фонында ЮНЕСКО миссиясе, аның Уставында билгеләнгәнчә, кешеләрнең акылларына тынычлык идеясен унаштыру, аңа ихтыяҗ бар. Һәм кайчак дөрес тәнкыйтькә дә карамастан, бу оешма барыбер алдынгы универсаль гуманитар оешма булып кала, киң багланышлар һәм халыкара элемтәләр үсеше өчен мәдәниятара, цивилизацияара диалог өчен бик нәтиҗәле мәйданчык булып тора», - диде Довгаленко.
ЮНЕСКО штаб-фатирыннан яңа ассоциацияләнгән мәктәпләргә 15 яңа сертификат алуын өстәде ул.
Үз чиратында, Шәймиев белдергәнчә, СССРның (Россия) ЮНЕСКОга керүе зур әһәмияткә ия. Ул әлеге оешма белән РФ арасындагы мөнәсәбәтләрнең 70 еллык тарихы халыклар һәм илләр арасындагы мөнәсәбәтләрне җайга салуда, шулай ук планетада мәдәни төрлелекне саклап калуда уртак көчләрнең нәтиҗәлелеген һәм перспективалы булуын раславына игътибар итте. Дәүләт киңәшчесе өстәгәнчә, барлык санап үтелгәннәр - үзен һәм милләтне сакларга теләгән барлык илләрнең бурычы.
«Сезгә билгеле булганча, Россиянең ЮНЕСКО белән күпьеллык хезмәттәшлеге Россия мәдәни мирас һәйкәлләрен саклау һәм яклау, шулай ук мәгариф, мәдәният, фәнни тикшеренүләр һәм мәгълүмати технологияләр, тиешле юнәлешләр институтларын булдыру өлкәсендә конструктив эшчәнлек алып бара. Бу бөтен нәрсәне колачлый торган проблемалар, бөтен халык мәнфәгатенә кагыла», - диде Шәймиев.
Ул шулай ук Татарстанның ЮНЕСКО белән узган гасырның 90нчы елларында ук хезмәттәшлек итә башлавын искәртте. 2010 елда төзелгән «Яңарыш» республика фонды бу хезмәттәшлеккә яңа этәргеч бирде.
«Без хәзер ЮНЕСКО һәм гомумән ЮНЕСКО эшләре буенча Россия комиссиясе белән бик тыгыз элемтәдә эшлибез. Шуңа күрә бездә ЮНЕСКОның ассоциацияләнгән мәктәпләре, ЮНЕСКО кафедралары, ЮНЕВОК үзәге белән бәйле юнәлешләр буенча проектлары аз түгел. Хәзер республика ЮНЕСКО объектлары саны буенча илдә лидер булып тора. РФ җитәкчелегенә, Россия тышкы эшләр министры, Россиянең ЮНЕСКО эшләре буенча комиссиясе рәисе Сергей Викторович Лавровка һәм Комиссиянең җаваплы секретаре Татьяна Евгеньевна Довгаленкога безгә яхшы, игътибарлы, грамоталы ярдәм күрсәткән өчен рәхмәт белдерәсем килә», - дип йомгаклады Шәймиев.