Шәһәр көнендә Гүзәл Сәгыйтова һәм Айнур Сафиуллин яшь гражданнарга паспорт тапшырдылар
Республика һәм Шәһәр көне уңаеннан «Казан» гаилә үзәге янында узган зур бәйрәм концертында Казан шәһәре башкарма комитеты җитәкчесенең социаль мәсьәләләр буенча урынбасары Гүзәл Сәгыйтова һәм Россия Герое, 29 яшьлек майор Айнур Сафиуллин Россия Федерациясенең 12 яшь гражданнарына паспортлар тапшырдылар.
«Бу - сезнең тормышыгызда яңа баскыч, яңа җаваплылык. Без сезне бу мөһим көн белән котлыйбыз, һәм сезнең игелекле, акыллы, амбициоз булуыгызны, сәләтләрегезне белдерүегезне, яңа ишекләрне ачуыгызны һәм яңа белемнәр алуыгызны телибез. Һәм, әлбәттә, шәһәр, республика һәм ил иминлеге өчен эшләп, үз халкыгызның горурлыгы булырга насыйп булсын», – дип, теләде Гүзәл Сәгыйтова.
Паспортлардан тыш, яшьләргә Россия Федерациясе һәм Татарстан Республикасы Конституциясе дә бүләк итеп бирелде.
Айнур Сафиуллин да шулай яшьләрнең тормышында яңа чор башлануын билгеләп узды. «Бүген яшь гражданнар тормышларының яңа чорына аяк бастылар. Мин аларга бу статуста гражданлык бурычларын фидакарь итеп үтәүләрен һәм нык булуларын телим», – диде ул.
Форсаттан файдаланып, ул казанлыларны һәм Татарстан Республикасы кунакларын бәйрәм белән дә котлады. «Мин бүген биредә булуыма һәм әлеге бәйрәмне сезнең белән уртаклашуыма бик шатмын. Татарстан – илебезнең әйдәп баручы төбәге һәм Президент Владимир Владимирович Путинның ышанычлы терәге», – дип, билгеләде Айнур Сафиуллин.
