Татар әдәбияты 10 апрель 2023 00:16

Сәгыйть Сүнчәләй. Төш

Скопировать ссылку

Карлыгачым, мин үзеңне
Бик сөям, бик, ахрысы!
Төш кебек күңлемне нурлый
Изге гыйшкың яктысы.

Мин күрәмен күзләреңне,
Сокланам мин, шатланам.
Онтамын дөньямны! Онтам
Кайгыларымны тәмам.

Эндәшәсең, җылмаясың –
Сөйнәмен нәкъ яшь бала!
Балкый күңлемдә тәҗәлла –
Кайгыларым таркала...

Сәгыйть Сүнчәләй (1889-1937) – шагыйрь, тәрҗемәче, дәүләт һәм җәмәгать эшлеклесе. Саратов губернасының Хуалыйн өязе Иске Мастяк авылында (хәзерге Ульяновск өләсе Иске Кулаткы районы) туа. Озак та үтми аларның гаиләсе Әстерханга күченә. Беренче әсәрләрен шунда яшәгәндә иҗат итә. Шигырьләре Әстерхан, Казан, Оренбург, Петербург, Уфа һәм башка шәһәрләрдә чыккан татар газета һәм журналларында дөнья күрә. Күп кенә рус һәм чит ил шагыйрьләренең әсәрләрен татарчага тәрҗемә итә, пьесалар һәм публицистик мәкаләләр яза. Аның талантлы музыкант һәм җырлар авторы булуы да билгеле. Озак еллар мөгаллимлек белән шөгыльләнә, мәгариф өлкәсендә эшли. XX гасырның 30нчы елларындагы сәяси репрессияләр җиле аны да урап узмый – «партия һәм Совет хакимиятенең дошманы» дип игълан ителә һәм 1937 елда атып үтерелә. 1958 елда аклана.

#Сәгыйть Сүнчәләй әсәрләре #сәгыйть сүнчәләй #сагит сунчелей #сагит сюнчелей

Сәхифәләр

Сәгыйть Сүнчәләй. Төш