Татар әдәбияты 10 апрель 2023 00:17

Сәгыйть Сүнчәләй. Дога

Скопировать ссылку

Йа Ходайя! Рәхмәтеңнән безне мәхрүм кыйлма син!
Күңелебезнең ак күгәрчендәй теләген тыңла син!

Күңлебездә шулкадәр тәмле теләкләр, Раббыбыз!
Пакь иман берлән тибә безнең йөрәкләр, Раббыбыз!

Мәңге мәгъсум, мәңге нурлы булса иде күңлебез!
Әкрен-әкрен, ямьле, һәйбәт үтсә иде гомребез!

Мәңге күрсәт безгә, мәүла, яктылыкка якты юл!
Күңлебезнең ак күгәрчендәй теләген кыйл кабул!

Сәгыйть Сүнчәләй (1889-1937) – шагыйрь, тәрҗемәче, дәүләт һәм җәмәгать эшлеклесе. Саратов губернасының Хуалыйн өязе Иске Мастяк авылында (хәзерге Ульяновск өләсе Иске Кулаткы районы) туа. Озак та үтми аларның гаиләсе Әстерханга күченә. Беренче әсәрләрен шунда яшәгәндә иҗат итә. Шигырьләре Әстерхан, Казан, Оренбург, Петербург, Уфа һәм башка шәһәрләрдә чыккан татар газета һәм журналларында дөнья күрә. Күп кенә рус һәм чит ил шагыйрьләренең әсәрләрен татарчага тәрҗемә итә, пьесалар һәм публицистик мәкаләләр яза. Аның талантлы музыкант һәм җырлар авторы булуы да билгеле. Озак еллар мөгаллимлек белән шөгыльләнә, мәгариф өлкәсендә эшли. XX гасырның 30нчы елларындагы сәяси репрессияләр җиле аны да урап узмый – «партия һәм Совет хакимиятенең дошманы» дип игълан ителә һәм 1937 елда атып үтерелә. 1958 елда аклана.

#Сәгыйть Сүнчәләй әсәрләре #сәгыйть сүнчәләй #сагит сунчелей #сагит сюнчелей

Сәхифәләр

Сәгыйть Сүнчәләй. Дога