Татар әдәбияты 8 апрель 2023 00:03

Сәгыйть Рәмиев. Ярлылык

Скопировать ссылку

Татар шәкертләренә

Әй ярлылык, мәлгунь, әй ярлылык!
Кайдан таптың шәкерт чагымны?
Бәдбәхет! Тапкан бәйләнер вакыт.
Чыраен сытмый, күзен йоммый,
Имеп имә актык канымны.
Буылгыры! Эче күбеп үлгере.

Торамын да карыйм, карыйм, күрәм:
Сансыз булган миңа мәлганәт.
Дөмеккән! Ничек котылыйм бу эттән?
Әйтмәс җирдән, Аллам, әйтәм инде:
Шул да булды микән гадаләт?
Яраббем! Нигә генә яраттың?!

Мәлганәт – ләгънәтләнергә тиешле яман эшләр.
Гадаләт – гаделлек.

Белешмә: Шагыйрь, прозаик, журналист Сәгыйть Рәмиев 1880 елның 24 (12) февралендә Оренбург губернасы Акман (Ибрай) авылында туа. «Хөсәения» мәдрәсәсендә белем ала. 1906 елда Казанга килә. Гомере буена газета һәм журналларда эшли. Әстерханда, Уфада яшәп һәм эшләп ала. 1926 елның 17 мартында Уфа шәһәрендә вафат була, шунда мөселман зиратында җирләнә.

#Сәгыйть Рәмиев

Сәхифәләр

Сәгыйть Рәмиев. Ярлылык