Татар әдәбияты 8 апрель 2023 00:30

Сәгыйть Рәмиев. Лермонтов шигырьләренә парчалар

Скопировать ссылку

***
Язам, язам гамьсез кулым белән,
Монда бик күп еллардан соң дип,
Кыска, әмма авыр бу гомремнән
Нинди булса бер эз калмасын дип...

***
Күңелемдә минем, зур диңгездәге кебек,
Җимерек өмидләрдән тау ята.

***
Кешеләргә күренгәннән мин яхшырак,
Тышымнан эчем минем күп яктырак...
Ант итәм: тәхкыйрь, ачу, кинә түгел,
Күңелемдә илгә каршу янган чыраг...

***
Күк берлән мин тату булмак телим,
Телим сөю, сөйим димен мин,
Телим табыну, табынып Ходаема,
Игелеккә иман итим дим…

Тәхкыйрь – хурлау.

Белешмә: Шагыйрь, прозаик, журналист Сәгыйть Рәмиев 1880 елның 24 (12) февралендә Оренбург губернасы Акман (Ибрай) авылында туа. «Хөсәения» мәдрәсәсендә белем ала. 1906 елда Казанга килә. Гомере буена газета һәм журналларда эшли. Әстерханда, Уфада яшәп һәм эшләп ала. 1926 елның 17 мартында Уфа шәһәрендә вафат була, шунда мөселман зиратында җирләнә.

#Сәгыйть Рәмиев #Сәгыйть Рәмиев шигырьләре

Сәхифәләр

Сәгыйть Рәмиев. Лермонтов шигырьләренә парчалар