Сабаның Шәмәрдән участок хастаханәсендә укучыларга һөнәри юнәлеш бирү чарасы үткәрелде
3-15 февраль көннәрендә Татарстанда XII «Ак халатлы фәрештәләр» фестивале уза. Ул укучыларны медицина һөнәрләре белән таныштыру максатыннан үткәрелә. Фестиваль кысаларында Шәмәрдән участок хастаханәсе базасында «Ачык ишекләр көне» һөнәри юнәлеш бирү чарасы үткәрелде. Бу хакта http://saby-rt.ru/ хәбәр итә.
Укучылар халыкка медицина хезмәте күрсәтү буенча баш табиб урынбасары Гөлназ Гарифуллина һәм Шәмәрдән участок хастаханәсе баш табибы вазифаларын башкаручы Гөлсинә Шәрипова чыгышын тыңлады. Укучыларга сәламәтлек саклау өлкәсенә кагылышлы бай мәгълүмат бирелде.
Чарада шулай ук Саба районыннан Казан дәүләт медицина университетының педиатрия, дәвалау факультетларында белем алучы VI курс студентлары катнашты. Экскурсия барышында балаларга ЭКГ һәм УЗИ кебек тикшеренүләрнең ни өчен үткәрелүен җентекләп аңлатты. Аннары теләге булган һәр кеше тикшеренү узды.
«Ачык ишекләр көне» югары сыйныф укучыларына табиб һөнәренә кызыксыну уятырга, районның әйдәп баручы медицина белгечләре белән аралашырга, шулай ук балаларны район үзәк хастаханәсе эше белән таныштырырга мөмкинлек бирә.