Авыл 15 ноябрь 2018 06:00

Сабада авыл хуҗалыгы хезмәтчәннәрен бүләкләделәр

Уртак тырышлык белән һәр гектардан уртача 28,1 центнер уңыш җыйнап алынган, тулаем җыем 71716 тонна булган.

Скопировать ссылку

(Саба, 15 ноябрь, "Татар-информ", "Саба таңнары",Фәнил Мәүлетов). Узган атнада Сабада 2018 ел уңышын җыйнауда эшләгән комбайнчылар, механизаторлар, ашлык, терлек азыгы ташучылар көтеп алган бәйрәм – игенчелек тармагы алдынгыларын хөрмәтләү тантанасы булды. Бу турыда район газетасы яза.

Мәдәният йортында икмәк язмышын хәл иткән 300дән артык кыр батыры алкышланды. Гомерләрен иген үстерүгә багышлаган ветераннарга урын түрдән бирелде.

Игенчеләрне хезмәтләренең нәтиҗәләре белән таныштырган авыл хуҗалыгы һәм азык-төлек идарәсе начальнигы Гафур Хәсәншин чыгышыннан күренгәнчә, район механизаторлары уракны 8 сентябрьгә республикада беренчеләрдән булып төгәлләгәннәр.

Уртак тырышлык белән һәр гектардан уртача 28,1 центнер уңыш җыйнап алынган, тулаем җыем 71716 тонна булган.

"Уңыш бәйрәме"ндә авыл хуҗалыгы һәм азык-төлек министры урынбасары Тәлгат Таһирҗанов алдынгыларга министрлыкның Мактау грамоталарын тапшырды.

Котлауларны Саба муниципаль районы башлыгы Рәис Миңнеханов дәвам итте. Сәхнәгә 100дән артык игенче, хезмәт ветераннары чакырылды.

#Саба таңнары

Сәхифәләр

Сабада авыл хуҗалыгы хезмәтчәннәрен бүләкләделәр