S7 Airlines авиакомпаниясенә йөз Ту-214 лайнерын китерү турында меморандум имзаланды
Бүген Татарстан Рәисе Рөстәм Миңнеханов катнашында «Ростех» дәүләт корпорациясенә керүче «Берләшкән авиатөзелеш корпорациясе» ГАҖ һәм «Себер» авиакомпаниясе» АҖ (S7 Airlines) арасында авиакомпаниянең флотын киңәйтү мәсьәләсе буенча үзара хезмәттәшлек турында меморандум имзаланды. Бу хакта ТР Рәисе матбугат хезмәте хәбәр итә.
Документ «Туполев» АҖ филиалы – С.П.Горбунов исемендәге Казан авиация заводында имзаланды. Анда Берләшкән авиатөзелеш корпорациясе генераль директоры Юрий Слюсарь һәм S7 компанияләр төркеме акционеры Владислав Филев имзасын куйды.
Меморандум Себер авиакомпаниясе ихтыяҗлары өчен йөз камилләштерелгән Ту-214 пассажир самолетын китерү буенча уртак эшне күздә тота.
Элегрәк «Татар-информ» хәбәр иткәнчә, Рөстәм Миңнеханов Казан авиация заводында механик эшкәртү үзәге төзелеше темпларын бәяләде.