Сәйдә Мөхәммәтҗанова Мәскәүдә "Балафест" фестивалендә җырлаячак
Фестиваль программасы өч яшькә кадәрге балаларга җыр-уеннар аша милли тәрбия бирүне күз алдында тотып төзелгән.
Скопировать ссылку
(Казан, 18 октябрь,"Татар-информ"). Төгәл бер айдан, 18 ноябрь көнне, Мәскәүдәге татар балалары "Балафест" фестивалендә Сәйдә Мөхәммәтҗанова чыгыш ясаячак. Бу хакта Татарстан Республикасының Россия Федерациясендәге Тулы вәкаләтле вәкиллеге хәбәр итә.
Фестивальнең программасы өч яшькә кадәр булган балалар өчен әзерләнгән. Анда килүчеләр өчен концерт, балалар кул эшләре күргәзмәсе, танылган татар шәхесләре портретлары күргәзмәсе, театральләштерелгән тамаша, татар әкиятләре геройлары белән анимацияле уеннар, мастер класслар, лекторий, татарча мультфильмнар һ.б. әзерләнгән. Шулай ук, фестиваль кысаларында, хәйрия акциясе дә уздырылачак, диелә хәбәрдә.
Чараның максаты - замана Мәскәү татарлары гаиләләре арасында милли горурлыкны арттыру; балаларны мәдәни мохиткә тарту; татар халкы тарихы, ризыклары, гореф-гадәтләре белән таныштыру.