Татарстанда тавыш бирү участокларына ашыгыч ярдәм чакыру очраклары булмаган
Республикада ашыгыч медицина ярдәме югары әзерлек режимында эшли.
(Казан, 1 июль, «Татар-информ», Зилә Мөбәрәкшина). Хәзерге вакытта Татарстанда РФ Конституциясенә төзәтмәләр буенча тавыш бирү уңаеннан оештырылган сайлау участокларына ашыгыч ярдәм чакыру очраклары теркәлмәгән. Бу хакта ТР сәламәтлек саклау министры урынбасары — Казанның Сәламәтлек саклау идарәсе башлыгы Владимир Жаворонков Гомумроссия тавыш бирүнең республика матбугат үзәгендә хәбәр итте.
«Бүген ашыгыч ярдәм машиналарының әзерлек дәрәҗәсе югары, әгәр участок сайлау комиссияләреннән чакыру килгән икән, медицина хезмәткәрләре мөмкин кадәр тиз килеп җитә алачак. Медицина хезмәткәрләренең тавыш бирү өчен участокларның тулы исемлеге бар», — диде ул.
Жаворонков вазгыятьне тикшереп торуларын белдерде. «Тулырак нәтиҗәләр соңрак булачак, чөнки мәгълүматны бөтен республикадан җыябыз. Мин Казан, Әлмәт, Яр Чаллы, Түбән Кама кебек зур шәһәрләрдәге хезмәттәшләрдән ашыгыч медицина ярдәме чакырулары бармы, дип кызыксындым. Участок сайлау комиссияләренә бер генә чакыру да теркәлмәгән», — диде спикер.
Бүген бөтен Россия буенча РФ Конституциясенә төзәтмәләр буенча тавыш бирү бара. Татарстанда 65 территориаль һәм 2,8 мең участок сайлау комиссияләре эшли.