Сөләйман Рәхимов Ризаэтдин Фәхретдиннең язма мирасы аз өйрәнелгән дип саный
Ризаэтдин Фәхретдиннең барлыгы 29 хезмәте, “Шура” журналында йөзләгән мәкаләләре басылып чыккан.
(Казан, 20 февраль, “Татар-информ”, Марат Мөбарәкшин). Болгар ислам академиясенең ислам мирасы үзәге директоры Сөләйман Рәхимов дин эшлеклесе, галим Ризаэтдин Фәхретдиннең язма мирасы бүгенге көнгәчә аз өйрәнелгәнлеге турында җиткерде. Бу турыда ул “Татар-информ” хәбәрчесенә әйтте.
“Ризаэтдин Фәхретдиннең бүгенге көнгә кадәр язма мирасы аз өйрәнелгән. Инде 60 ел буена бер язма мирасы да басылып чыкмады. Китапларының күбесе революциягә кадәр басылып чыккан. Бары тик “Асар”ның өченче һәм дүртенче томнары гына чыкты бит әле”, - диде Сөләйман Рәхимов.
Ризаэтдин Фәхретдин – тарихчы, әдип, педагог һәм дин эшлеклесе. Ул — йөздән артык хезмәт авторы. Аның “Тәрбияле бала”, “Тәрбияле ана”, “Шәкертлек әдәбе” дәреслекләре, “Сәлимә, яки Гыйффәт” (1899), “Әсма, яки Гамәл вә җәза” (1903) әдәби әсәрләре, «Асар» тарихи хезмәтләре нәшер ителгән.
1907 елга кадәр Ризаэтдин Фәхретдиннең барлыгы 29 исемдәге әдәби, тарихи, гыйльми педагогик, дини хезмәтләре һәм әсәрләре басылып чыккан. Шулай ук «Шура» журналында аның йөзләгән мәкаләләре дөнья күргән.