Миңнеханов коммуналь хезмәт өчен нигезләнмәгән югары счет тәкъдим итүгә юл куймаска кушты
Татарстан Рәисе Рөстәм Миңнеханов ТР Төзелеш, архитектура һәм ТКХ министрлыгына һәм башка ведомстволарга торак-коммуналь хезмәтләр өчен нигезләнмәгән югары счетлар тәкъдим итүгә юл куймау һәм хаталар киткән очракта аларны яңадан исәпләү буенча чаралар күрергә кушты. Бу хакта ТР Рәисенең матбугат хезмәте хәбәр итә.
Миңнеханов суыклар башлану белән коммуналь хезмәтләр өчен түләүләр күләме артуга карата шикаятьләр санының күбәюенә игътибар юнәлтте, шулай ук ноябрьнең җылы килүенә карамастан, халыкны бу мәсьәлә борчый дип билгеләп үтте.
«Халык суыклар башлангач түләүләр тагын да артыр дип курка... «Кайнар элемтә» оештырыгыз. Кешеләргә барысын да аңлатырга кирәк. Бу – безнең эшебез», – диде ТР Рәисе.