Хәвеф-хәтәр 8 март 2018 14:47

Рус булмаган халыкларны кимсеткән Башкортстан кешесе хөкем ителде

Суд аны Россия Җинаять кодексының 282нче маддәсе беренче өлеше (дошманлык хисләре уяту, шулай ук кешенең абруен түбәнсетү) буенча гаепле дип тапты.

Скопировать ссылку

(Казан, 8 март, «Татар-информ»). Башкортстанның Благовещенск районы суды милләтара низаг чыгаруда гаепләнүче 27 яшьлек ир-егеткә карата хөкем карары чыгарды. Бу хакта «Интерфакс» агентлыгы район прокуратурасы матбугат хезмәтенә сылтама ясап хәбәр итә.

Ачыкланганча, гаепләнүче 2014-2016 елларда «ВКонтакте» социаль челтәрендәге үз сәхифәсендә «дин тотучыларның хисләрен түбәнсетә, рус булмаган милләтләргә карата дошманлык хисләре уятырга чакыра торган сурәтләр» урнаштырган.

Суд аны Россия Җинаять кодексының 282нче маддәсе беренче өлеше (дошманлык хисләре уяту, шулай ук кешенең абруен түбәнсетү) буенча гаепле дип тапты һәм шартлы рәвештә 2,5 елга ирегеннән мәхрүм итте.

Ул үз гаебен таныды.

#җинаять

Сәхифәләр

Рус булмаган халыкларны кимсеткән Башкортстан кешесе хөкем ителде