Рөстәм Миңнеханов урамнарны һәм ишегалларын кардан чистарту темпларын көчәйтергә кушты
Шушы көннәрдә Татарстанда яуган кар халыктан территорияләрне вакытында кардан чистартмауга бәйле мөрәҗәгатьләрнең артуына китергән. Республика Рәисе Рөстәм Миңнеханов ТР Хөкүмәте йортында узган шимбә киңәшмәсендә юлларны һәм җәяүлеләр зонасын кардан арындыру тизлеген һәм сыйфатын арттырырга кушты. Бу хакта ТР җитәкчесенең матбугат хезмәте хәбәр итә.
Ул муниципалитет, профиль министрлык һәм ведомство башлыкларын әлеге теманы шәхси контрольгә алырга, шулай ук татарстанлыларның юлларны кардан чистартуга бәйле сорауларына вакытында илтифат итәргә чакырды. Тагын бер мөһим әйбер – күп фатирлы йорт түбәләре торышын мониторинглау.
Әйтик, шушы көннәрдә яуган кардан соң халыктан 575 шикаять килгән.
«Кешеләр автомобиль юлларын вакытында кардан чистартмау транспорт хәрәкәтен кыенлаштыруы, аварияләр саны арту, җәмәгать транспортының үтемлелеге кимүе хакында хәбәр иткән», - дип искәртте республика җитәкчесе.
Республикада яшәүчеләрнең иминлеге тротуарларны, социаль объектларга килү юлларын һәм ишегалларын кардан чистартуга бәйле. Шуңа күрә бу мәсьәлә аерым игътибар таләп итә, дип сүзен дәвам итте ул. Яңа ел бәйрәмнәрендә дә эш темпларының кимемәве мөһим.
«Бу тема һәр җитәкченең шәхси контролендә булырга тиеш. Гражданнарның сигналларына вакытында илтифат итәргә, йорт түбәләреннән кар һәм боз төшү куркынычына игътибар бирергә кирәк», - дип белдерде Миңнеханов.