Рөстәм Миңнеханов Ульяновскидагы федераль Сабан туена килде
Кунакларны Татар дәүләт җыр һәм бию ансамбле һәм «Волга» ансамбле егет-кызлары чәкчәк һәм икмәк белән каршы алды.
Татарстан Президенты Рөстәм Миңнеханов Ульяновск Сабан туена килде һәм кунакларга татар милли баш киеме - түбәтәйләр кидерде.
Кунаклар арасында Ульяновск өлкәсе губернаторы Алексей Русских, Кемерово өлкәсе губернаторы Сергей Цивилёв, элекке хоккейчы Владислав Третьяк бар иде. Рөстәм Миңнеханов аларга түбәтәйләр кидерде. Кунакларны Татар дәүләт җыр һәм бию ансамбле һәм «Волга» ансамбле егет-кызлары чәкчәк һәм икмәк белән каршы алды.
Кунаклар милли ашлардан авыз итте һәм Сабан туе мәйданчыгын карый башлады. Мәйданчыкта төрле районнардан килгән аш-су һәм сәнгать осталары, сату нокталары, күргәзмәләр эшли. Федераль Сабан туеның рәсми ачылышы ипподромдагы төп сәхнәдә була.