Рөстәм Миңнеханов укытучыларның һөнәри әзерлегенә игътибар итүне сорады
Татарстан Рәисе Рөстәм Миңнеханов укытучыларның һөнәри әзерлегенә игътибар итүне сорады. Республика җитәкчесе бу хакта Казанда мәгариф һәм фән хезмәткәрләренең август киңәшмәсендә белдерде.
«Укытучының статусы, абруе бик мөһим. Югары уку йортлары укытучылары турында онытырга ярамый. Бу сорауларны тикшерүгә ректорларны чакырыгыз», — диде Рөстәм Миңнеханов җыелганнарга.
Ул узган уку елында педагоглар, мәгариф оешмалары җитәкчеләре, район башлыклары тарафыннан мәгариф өлкәсендә зур эш башкарылганлыгын искәртте.
Рөстәм Миңнеханов ярдәм һәм хезмәттәшлек өчен Россия Хөкүмәтенә рәхмәт белдерде. Мәгариф министры Сергей Кравцов һәм фән һәм югары белем министры Валерий Фальковка Татарстанда мәгарифне үстерүдә һәм Педагог һәм остаз елы кысаларында чараларны гамәлгә ашыруда шәхсән катнашканнары өчен аерым рәхмәт сүзләрен җиткерде.
Киңәшмә ахырында Татарстан Рәисе иң яхшы педагог хезмәткәрләргә бүләкләр тапшырды.
