Рәсми Татарстан 19 апрель 2024 15:01

Рөстәм Миңнеханов: Татарстанда «Беренчеләр хәрәкәте»ндә 200 мең бала катнашты инде

Скопировать ссылку

Казанда «Алга! Киттек» форумы башланды. Анда «Беренчеләр хәрәкәте» конкурсларында катнашкан якынча 1 мең лауреат һәм җиңүче җыелды. Бу турыда «Татар-информ» хәбәрчесе Арсений Кәримов яза.

Шулай ук оешма казанышларына һәм киләчәккә планнарга багышланган күргәзмә дә оештырылды. Аны Татарстан Республикасы Рәисе Рөстәм Миңнеханов карады, шуннан соң чарада катнашучыларны сәламләде.

«Татарстанда инде 200 мең бала «Беренчеләр хәрәкәте»ндә катнашты. Бу безнең ил лидеры Владимир Путин тарафыннан дөрес курс сайлануы турында сөйли. Безнең республика үзен барлык юнәлешләр буенча да күрсәтергә тиеш. Әгәр без үз илебезне, төбәкне, торак пунктны, ата-аналарны яратмасак, традицияләрне сакламасак, киләчәгебез юк. Безнең актив яшьләребез һәм бу хәрәкәт ярдәмендә мондый куркыныч юк. Без сезгә ышанабыз», - диде республика җитәкчесе.

Ул «Беренчеләр хәрәкәте»нең барлык инициативалары Татарстан җитәкчелеге тарафыннан хупланачагына ышандырды һәм балаларга уңышлар теләде.

Күргәзмәдә Татарстан Рәисенә республикада «Беренчеләр хәрәкәте»нең иң уңышлы гамәлләре һәм хәрәкәтнең якын арада гамәлгә ашырырга теләгән проектлары турында сөйләделәр. Аның берсе «беренчеләр»нең балалар банк картасы булды. Аның уникаль дизайны һәм билгеле бер сервисларда һәм кибетләрдә сатып алганда кешбэк белән лояльлек системасы 10 процентка кадәр каралган. Картаны 6 яшьтән 18 яшькә кадәрге балаларга һәм яшүсмерләргә бушлай алырга мөмкин була.

Шулай ук форумда «Беренчеләр хәрәкәте» премиясенә йомгак ясадылар. «Ел остазы» номинациясендә җиңүчеләрне Татарстан Рәисе ярдәмчесе, оешманың Татарстан бүлекчәсе җитәкчесе Тимур Сөләйманов бүләкләде.

«Сез барыгыз да җиңүчеләр, чөнки сез инде «Беренчеләр хәрәкәте»ндә. Без бер зур гаилә. Һәр гаиләдә әти-әни, абый-апалар һәм безгә юнәлеш бирүче башка кешеләр бар. «Беренчеләр хәрәкәте»ндә бу рольне безнең остазлар башкара. Әйдәгез, аларга тагын бер кат зур рәхмәт әйтәбез», - дип Сөләйманов катнашучыларга мөрәҗәгать итте .

Казаннан соң «Алга! Киттек» форумы Татарстанның тагын 5 шәһәрендә узачак.

Сәхифәләр

Рөстәм Миңнеханов: Татарстанда «Беренчеләр хәрәкәте»ндә 200 мең бала катнашты инде