Рөстәм Миңнеханов Татарстан районнарында өч футбол манежы ачты

Татарстан Президенты Рөстәм Миңнеханов Биектау бистәсендә, шулай ук видеоконференция режимында Буа һәм Минзәлә шәһәрләрендә мини-футбол манежларын ачу тантанасында катнашты. Аларның төп өстенлеге шунда, үсмерләр ел әйләнәсе ясалма газонда уңайлы шартларда уйный алачак.

«Без барыбыз да футболны яратабыз, ләкин климат зонасында аны бездә җәен генә уйнап була. Безнең программа бар, аның буенча Татарстанның һәр муниципаль районында ябык футбол манежы барлыкка киләчәк. Быел без алтыны төзеп ачтык, киләсе елга шундый дүрт объектның барлыкка килүе планлаштырылган. Шулай итеп, без барлык балаларның да районнарда футбол уйнау мөмкинлеге булачагына ирешәчәкбез», - диде Рөстәм Миңнеханов Биектау манежын ачу чарасында.

ТР Президенты сүзләренчә, ябык футбол манежлары булган системаны ул Исландиядә күргән, ул Россиядә Футбол буенча дөнья чемпионаты ачылышларының берсе булган. Анда футбол өчен климат тагы да кырысрак, әмма шуңа да карамастан, бу спорт төре ябык мәйданчыклар ярдәмендә актив үсә.

Татарстан Республикасы спорт министры Владимир Леонов фикеренчә, мондый система массакүләм спортны үстерүгә юнәлдерелгән, аннары вакыт узу белән бу профессиональ клубларда да чагылыш табачак.

«Бездә университетлар территориясендә спорт мәйданчыклары төзү программасы бар. Кечкенә футбол манежларына да ихтыяҗ барлыгын аңладык. Яшел Үзәндә шундыйны булдырдык, ул барысына да бик ошады, шуннан соң аларны бөтен республика буенча актив ачып җибәрә башладык. Беренче чиратта, без массакүләм спорт турында сөйләшәбез. Татарстанда футбол - иң популяр спорт төре. Профессионалларга килгәндә, бу «озак» уен. Биредә безнең профессиональ клублар резервы булачак егетләрне тәрбияләү бурычы бар», - диде министр.

Рөстәм Миңнеханов Биектауның «Эверест» командасы егетләрен сәламләде. Яшь һөҗүмче Ислам Абдуллин сүзләренчә, элек команда җәй көне мәктәп янындагы кырда, ә кышын спорт комплексында паркетта шөгыльләнгән. Яңа кыр аңа һәм аның дусларына бик ошаган – йомшак ясалма газонда туп белән эшләү җиңелрәк, егылганда да бөтенләй авыртмый, диде Ислам.

«Мин футболны бик яратам. Ул миңа бик күп хисләр бирә. Узган ел без 2011 елда туган үсмерләр арасында икенче урын алдык. Мин профессиональ футболчы булырга һәм Россия җыелма командасына эләгергә хыялланам», – дип планнары белән уртаклашты 10 яшьлек форвард.

Рөстәм Миңнеханов өч футбол манежы директорына да җиһаз сатып алуга сертификат тапшырды, шулай ук туп белән символик һөҗүм ясады.