Рөстәм Миңнеханов «Тәртип» радиосын 10 еллыгы белән котлады
Татарстан Республикасы Рәисе Рөстәм Миңнеханов «Тәртип» радиосының оешуына 10 ел булу уңаеннан аның баш мөхәррире Ризәлә Исмәгыйлевага телеграмма юллады.
«Тәртип» радиосы коллективын аның тарихындагы тәүге зур вакыйга – оешуына 10 ел тулу уңаеннан чын йөрәктән котлыйм. Бу еллар эчендә сез кабатланмас үзенчәлекле эш өслүбегезне булдыруга, бик күп татарстанлыларның күңеленә юл табуга ирештегез. Моның сере бик гади – сезне игелекле хезмәткә ата-бабаларыбызның бай мирасына ихлас мәхәббәт һәм тапшыруларыгызны тыңлаучыларга карата олы ихтирам рухландыра», – диелгән телеграммада.
Рәсми котлауда Республика Рәисе «Тәртип» радиосының туган телне, милли гореф-гадәтләрне саклауда ролен дә билгеләп үтә.
«Тату коллективыгызга гаять әһәмиятле мәдәни, мәгълүмати һәм мәгърифәти программаларны гамәлгә ашыруы, туган телебезне, милли гореф-гадәтләребезне саклауга зур өлеш кертүе өчен хөрмәт һәм рәхмәт хисләремне белдерәм. Сезгә киләчәктә дә илһамлы омтылышлар, халыкның ихтыяҗы булган массакүләм медиа проектлар, иҗади ачышлар һәм яңадан-яңа уңышлар, нык сәламәтлек һәм бәхет телим», – ди Рөстәм Миңнеханов..