Рөстәм Миңнеханов Росздравнадзор башлыгы Алла Самойлова белән очрашты
Татарстан Рәисе Рөстәм Миңнеханов Сәламәтлек саклау өлкәсендә күзәтчелек федераль хезмәте (Росздравнадзор) башлыгы Алла Самойлова белән очрашты. Ул Казанга «НОВАМЕД – медицина эшләнмәләре әйләнеше-2026» VI бөтенроссия форумында катнашу өчен килде.
ТР Рәисе матбугат хезмәте хәбәр иткәнчә, очрашу ТР Хөкүмәт Йортында узган. Яклар халыкны ташламалы дарулар белән тәэмин итү өлкәсендәге уртак эш, шулай ук «Озын һәм актив тормыш» һәм «Гаилә» илкүләм проектларын тормышка ашыру турында сөйләшкән.
Элегрәк «Татар-информ» Казанның Бәшир Рәмиев исемендәге ИТ-паркында «НОВАМЕД-2026» форумы ачылуы турында хәбәр иткән иде. Чара беренче тапкыр Татарстан башкаласында үткәрелә. Форум программасы медицина җайланмалары әйләнеше өлкәсендәге дәүләт сәясәтенең барлык актуаль мәсьәләләрен үз эченә ала.