news_header_top_970_100
news_header_bot_970_100

Рөстәм Миңнеханов нефть химикларына Татарстан үсешенә керткән өлешләре өчен рәхмәт әйтте

Татарстан Президенты Рөстәм Миңнеханов Түбән Камада Химиклар көнен бәйрәм итүдә катнашты. Ул нефть химикларына республика үсешенә керткән өлешләре өчен рәхмәт белдерде.

«Мин нефть химикларына Татарстан үсешенә зур өлеш керткәннәре өчен рәхмәт белдерәм. Сезне тагын бер кат бәйрәм белән котлыйм, республикабызның, илебезнең чәчәк атуын телим. Сезнең монда өлешегез бик зур», – дип хәбәр итә Рөстәм Миңнехановның сүзләрен Татарстан Президентының матбугат хезмәте.

Ул билгеләп үткәнчә, нефть химиясе предприятиеләре регионда сәнәгать җитештерүенең гомуми күләменең 40 процентын тәшкил итә. Тармак – Татарстан Республикасында иң мөһим үсеш нокталарының берсе.

Миңнеханов ассызыклаганча, бүген тармак алдында җитештерү үсеше ягыннан да, социаль мәсьәләләрне хәл итү ягыннан да җитди бурычлар тора.

«Бу – кадрлар әзерләү дә, нефтехимиклар яши торган шәһәрләрне төзекләндерү дә. Бу мәсьәләләр бездә өстенлекле булачак», – дип билгеләп үтте Татарстан Президенты.

Чарада Рөстәм Миңнеханов Татарстан Республикасының дәүләт бүләкләрен тапшырды. Нефть химиясе тармагында эшләүче кайбер хезмәткәрләргә мактаулы исемнәр бирелде.

news_right_column_1_240_400
news_right_column_2_240_400
news_bot_970_100