Рөстәм Миңнеханов Минск шәһәрендә «Тәмле Казан» фестивалендә булды
Татарстан Рәисе Рөстәм Миңнеханов Минск шәһәрендә Казан көннәре кысаларында уза торган «Тәмле Казан» фестивалендә булды. Бу хакта ТР Рәисе матбугат хезмәте хәбәр итә.
Өч көн дәвамында фестиваль мәйданчыкларында гастрономия зоналары эшли, һөнәрчеләр продукциясе күргәзмәсе, мастер-класслар, эшлекле форум һәм концерт программасы уза.
Катнашучыларга мөрәҗәгать итеп, Рөстәм Миңнеханов Минск һәм Белоруссия җитәкчелегенә чараны оештыруда ярдәмнәре өчен рәхмәт белдерде. Ул билгеләп үткәнчә, делегация Татарстан тарихы һәм мәдәнияте турында сөйләргә, социаль һәм икътисади өлкәләрдә тәҗрибә уртаклашырга, шулай ук кунакларны милли ашлар һәм гореф-гадәтләр белән таныштырырга килгән.
Шулай ук, Татарстан Рәисе сүзләренчә, Минск – бай тарихи мираслы һәм көчле характерлы кешеләр белән аерылып торган шәһәр.
Ул яклар арасындагы хезмәттәшлек үсәчәгенә һәм яңа проектлар, мөмкинлекләр барлыкка килүгә китерәчәгенә ышаныч белдерде.