Рәсми Татарстан 15 ноябрь 2024 16:00

Рөстәм Миңнеханов «Минем бизнес. E-com» форумы катнашучыларын сәламләде

Скопировать ссылку

Татарстан Рәисе Рөстәм Миңнеханов «Минем бизнес. E-com. Сатуларны активлаштыру коды» катнашучыларын сәламләде. Форум «Кече һәм урта эшмәкәрлек» илкүләм проекты кысаларында уза.

Форумны ачу тантанасында мөрәҗәгатьне Татарстан Республикасы Рәисе каршындагы эшмәкәрләр хокукларын яклау буенча вәкаләтле вәкил – ТР Рәисе ярдәмчесе Фәрит Габделганиев укыды.

«Интернет-сәүдә – иң динамик үсеш алучы тармакларның берсе. Татарстан бу өлкәне үстерүгә зур игътибар бирә. Республикада электрон коммерциягә ярдәм итүнең үз программасы булдырылды һәм уңышлы гамәлгә ашырыла. Бу программада катнашучылар өчен уңай шартлар тудырды. Хәзерге вакытта безнең республика электрон коммерция өлкәсендә алдынгы урыннарда тора. Татарстанда һәр сигезенче эшмәкәр продукциясен сату өчен маркетплейс каналларын куллана», - диелә Миңнеханов сәламләвендә.

Ул форумда катнашучыларга нәтиҗәле актив эш, билгеләнгән планнары тормышка ашуны һәм яңа уңышлар теләде.

«Минем бизнес. E-com. Сатуларны активлаштыру коды» бүген Казанда уза. Форумның хедлайнеры – Wildberries маркетплейсына нигез салучы, «РВБ» ҖЧҖ башлыгы Татьяна Ким. Пленар сессиядә шулай ук Ozon, «Магнит Маркет», «Яндекс» һәм «Aliexpress Россия» компанияләре топ-менеджменты вәкилләре чыгыш ясый.

Форумны Татарстан Республикасы Икътисад министрлыгы ярдәмендә «Маркетплейс.Җиңел» электрон сәүдә үзәге» коммерцияле булмаган автоном оешмасы белән берлектә ТР Эшмәкәрлекне яклау фондының «Минем бизнес» үзәге оештыра.

Сәхифәләр

Рөстәм Миңнеханов «Минем бизнес. E-com» форумы катнашучыларын сәламләде