Рөстәм Миңнеханов Казанга тапшырылган 65 яңа автобусны карады
Татарстан Рәисе Рөстәм Миңнеханов һәм Казан мэры Илсур Метшин Казанның «ПАТП-2» муниципаль унитар предприятиесе территориясендә яңа автобуслар тапшыру тантанасында катнашты. Паркка газ-моторлы 65 машина өстәлде. Бу турыда «Татар-информ» яза.
Республика җитәкчесе шәхсән үзе автобусларны эчтән дә, тыштан да бәяләде: машина йөртүче урынын, пассажирлар өлешен, салонны карады.
Казан башкарма комитетының Транспорт комитеты рәисе Алексей Сидоров сүзләренчә, бу шәһәргә тапшырылган автобусларның икенче партиясе. «20 машинадан торган беренче партияне сентябрьдә кабул иттек. Хәзер тагын 65 автобус алдык», - дип сөйләде ул журналистларга.
Рөстәм Миңнеханов шулай ук автобус йөртүчеләр белән аралашты, аларга эш шартлары турында сораулар бирде һәм яңа машиналар янында истәлеккә уртак фото ясады.
«2020 елгы автобуслар белән чагыштырсак, монда ике газ баллоны өстәлгән. Шул рәвешле газ тулы бер көнгә җитә, өстәргә кирәкми. Шулай ук биредә машина йөртүчегә дә, пассажирларга да кондиционер каралган», - дип сөйләде яңа автобусларның өстенлекләре турында машина йөртүчеләрнең берсе Наил Вәлиуллин.
Яңа автобусларда шулай ук күзәтү камералары урнаштырылган, машина йөртүче тышта да, эчтә дә бар нәрсәне күрә, дип өстәде ул. «Автобуслар бик йомшак йөри, түмгәкләрне бөтенләй сизмисең», – дип бәя бирде Вәлиуллин.