news_header_top_970_100
news_header_bot_970_100

Рөстәм Миңнеханов «Каравон-2022» рус халык бәйрәмендә булды

Бүген Татарстан Республикасы Президенты Рөстәм Миңнеханов «Каравон-2022» рус халык бәйрәмендә катнашты. Бәйрәм гадәттәгечә Татарстан Республикасы Лаеш муниципаль районының Никольское авылында узды. «Каравон» республикада 30нчы тапкыр үткәрелә. Бу турыда Татарстан Президентының матбугат хезмәте хәбәр итә.

Барлык теләүчеләр өчен махсус иҗади һәм тематик мәйданчыклар оештырылган. Концерт, уен һәм театральләштерелгән программалар үз эченә «Широкая ярмарка» (сәүдә рәтләре), «Петрушкин двор», рус халык әкиятләре мотивлары буенча театральләштерелгән тамашалар, «Мастеровые» – халык – сәнгать һөнәрләре буенча мастер-класслар, декоратив-гамәли сәнгать әйберләре күргәзмәсе-сату алу оештырылган.

Шулай ук «Каравон» тарихы музее буенча экскурсияләр, Никольское авылында яшәүчеләрнең һәм XIX - XX гасыр башларында «Каравон» ансамблендә катнашучыларның костюмлы комплекслары күргәзмәсе оештырылган. Рөстәм Миңнеханов төрле мәйданчыкларны һәм мастер-классларны карады, ярминкәгә декоратив-гамәли сәнгать эшләнмәләре алып килгән халык осталары белән аралашты.

Моннан тыш, Татарстан Республикасы Президентына Никольское авылы буенча проект – күзәтү виртуаль экскурсиясен тәкъдим иттеләр.

Шулай ук белгечләр милли рус костюмнарын тегә торган проект тәкъдим ителде. Рөстәм Миңнеханов күргәзмә үрнәкләре белән танышты һәм махсуслаштырылган күргәзмәләр оештыру мөмкинлеген карарга тәкъдим итте. «Безнең Казан Кремленең Гавами урыннары бинасында мәйданнарыбыз бар, һәм мондый күргәзмәләрне шунда эшләргә кирәк. Бу – безнең байлыгыбыз, мондый күргәзмәләр күпләрне кызыксындыра ала», - диде ул.

«Татарстан Республикасы Рус милли-мәдәни берләшмәсе» төбәк иҗтимагый оешмасы идарәсе рәисе Ирина Александровская ассызыклаганча, иң мөһиме – яшьләр бүген рус халык мәдәнияте белән кызыксыналар.

Татарстан Республикасы Президенты Рөстәм Миңнеханов бәйрәмдә катнашучыларга һәм кунакларга сәламләү сүзе белән мөрәҗәгать итте. Аерым алганда, «Каравон» 30 ел эчендә Татарстанның танылган брендына әйләнде һәм аннан республикада милли бәйрәмнәр башлана – алга таба мари, чуваш, башка халыклар бәйрәмнәре булачак, диде ул.

«Барлык кунакларга да – ә бу илнең 20 дән артык төбәге, 170 иҗат коллективына, халык һөнәрчелеге вәкилләренә – аларның барысы да безнең белән бергә эшләгәннәре өчен рәхмәт белдерәсем килә. Инициативалы төркемгә безнең республикада илебезнең тарихи, мәдәни традицияләрен һәм барлык халыкларының байлыгын саклаулары өчен рәхмәт белдерәсем килә. Әлбәттә, рус мәдәнияте – безнең илнең нигезе», - диде Рөстәм Миңнеханов «Каравон» сәхнәсеннән.

Рөстәм Миңнеханов шулай ук билгеләп үткәнчә, бүген яңгыр явуга карамастан, «Каравон» бәйрәме, һәрвакыттагыча, күпсанлы аудиторияне җыйды. «Һава торышы шундый булганга күрә бу көн алай ук уңайлы түгел, әмма үз осталыкларын күрсәтүче кешеләр биредә – аларга аерым рәхмәт! Алар барысы өчен дә шундый бәйрәм ясадылар. Без бүген төрле һөнәрләрне күрдек – агачтан чокып ясау, борынгы рус костюмнарын торгызучы белгечләр. «Каравон» бәйрәме елдан - ел киңәя бара», - диде Татарстан Президенты.

Чарада РФ Федераль Җыены Дәүләт Думасы депутаты Татьяна Ларионова, «Татарстан Республикасының Рус милли-мәдәни берләшмәсе» төбәк иҗтимагый оешмасы идарәсе рәисе Ирина Александровская, Лаеш муниципаль районы башлыгы Илдус Зарипов, башка рәсми затлар, бәйрәмнең мактаулы кунаклары катнашты.

Исегезгә төшерәбез, «Каравон» мәйданчыгына гадәттәгечә Россиянең төрле почмакларыннан күпсанлы коллективлар һәм тамашачылар җыела – аларның барысын да туган мәдәнияткә мәхәббәт, катнашу берләштерә.

Бәйрәм Россия халыкларының мәдәни мирасы елында аеруча зур яңгыраш ала, ул илнең барлык халыкларының этномәдәни күптөрлелеген һәм мәдәни үзенчәлеген саклап калуга юнәлдерелгән.

Аннары мәдәният вәкилләренә Татарстан Республикасы дәүләт бүләкләре һәм рус этномәдәни коллективларына сертификатлар тапшырылды. Бәйрәм концерты рус иҗат коллективлары, рус дәүләт академия рус халык хоры чыгышлары белән дәвам итте. 

news_right_column_1_240_400
news_right_column_2_240_400
news_bot_970_100